El 28 de febreru celebramos un actu d’homenaxe al que fue siempre Secretariu Xeneral del PAS, amigu perestimáu, xestor eficaz, persona noble y cabal.
Chus morrió de golpe y inesperadamente’l 31 d’avientu de 2025, al pie de la muyer, Carmela y lloñe de la patria.
«Memoria y señardá» fue la dedicatoria de la placa cola que lu homenaxeamos. Esi ye’l nuestru recuerdu.
Arreyo equí l’escritu que públicó LNE al dia siguiente la so muerte, y el que-y dediqué’l día l’homenaxe.
02/01/2026
A Xesús Cañedo Valle
¡Menuda nos la armaste, Chusín del alma! A toos, a la to muyer, Carmela, a los tos fíos, Nel y Antón, a los tos hermanos, Anabel y Jose Mari, a les tos nueres, a Olivia, Candela y Luz. Pero nun solo a ellos, a munchos de nosotros, a una parte importante del asturianismu, a tantos que t’apreciaben.
Lleo les notes que me lleguen peles redes y veo en munches l’apreciu pola to persona, polo bona persona que yes. Y dizlo xente prósimo, del asturianismu, amigos, pero tamién xente que te tuvo de compañeru de trabayu.
Tu non lo sopelexabes, porque yeres discretu y modestu, pero yo sí tengo que dicir cuánto te debemos. El to trabayu continuu, dende que dexamos aquel sitiu onde tábemos y venimos xuntanos pa fundar el PAS, del que, dende entós, yes Secretariu Xeneral. Lo que’l Partíu tenga dao a la sociedá asturiana, en fechos, en concencia de ser asturianu, en tantes coses, débetelo a ti, fundamentalmente. Y, particularmente, esa pieza que ye la Llei d’Usu y Promoción del bable/asturianu, que tu sabes bien cuánto tuvimos qu’andar, esbrexar y negociar pa sacala alantre. ¡Y cuanto tuvimos qu’aguantar nun solo de los enemigos del asturianu, sinón, sobre too, de los que dicíen ser los sos enfotaos! Di tu que llevástelo siempre con una sonrisa que yo nun siempre fui pa facer asomar.
Conmigo, ficiste y firmaste Mitoloxía asturiana. Refraneru, Los dioses derrotaos, El gran libro de la Mitología Asturiana, Mundu, saber y decir nel refraneru, pero d’otres munches coses que nun firmaste yes tu afalador o medio autor, como del recién El cuestu camín hacia la normalidá. Y ello, por nun facer recuentu agora de Proposiciónes de Lleis y otres iniciatives parllamentaries o, cenciellamente, polítiques o sociales.
¡Tanto te debo! ¡Tanto te debemos! ¡Tanto tantos te deben! Y ocúrresete dir a entamar l’añu d’esta manera, lloñe de casa, en Tenerife, en menos de 24 hores, sin dar tiempu a ningún a preparase, nin siquier a Carmela, que con Candela contigo taba, ehí, al delláu, desesperada.
Yá sé que dirás tu que hasta pa eso fuiste discretu, Chus, pero da igual. ¿Cómo se t’ocurre armánosla d’esta manera?
Porque, por más que nos armemos de recuerdos, de memoria, d’homenaxes, nada va ser p’apagar el dolor de la to ausencia y la señardá de la to persona.
Xuan Xosé Sánchez Vicente
Conversación con Xesús Cañedo Valle nel actu del so homenaxe’l 28 de xineru de 2026
Hola, Chus.
Güei nun vengo a refrontate, como te refronté a principios de mes, diciéndote aquello de “menuda nos la armaste” colando tan ceo, a toos, a Carmela, a Nel, a Antón, a Anabel, a Jose Mari, a les tos nietes, a les tos cuñaes, a la to familia, a los tos amigos.
Non. Vengo a date les gracies. En primer llugar, en nome de tolos asturianos, de munchos, al menos, pol to cuidáu de la cultura, como nesos estudios de la mitoloxía o del refraneru. O esa Llei d’Usu y Promoción del Asturianu, que toos sabemos que yes el pegollu fundamental d’ella. Pero non solo pol ámbitu de la cultura, tamién nel políticu. ¡Cuántes iniciatives tuyes, en tantes estayes, que granaron nel so momento, unes, o que lo ficieren dempués, otres! Pero especialmente por esos 10.000 asturianos que sacamos del paru colos presupuestos apautaos col Gobiernu Marqués. O esa desinfinidá d’obres que se punxeren en marcha, como l’Autovía Minera. ¿Alcuérdeste cuando hai poco más de dos meses entrábamos en Xixón, camín de l’avenida El Llano, y, señalando los pasos y los viaductos elevaos, dixísteme: “¿Alcuérdeste, Xuan, ehí tán los nuestros presupuestos?”.
Esa semeya que pasamos d’un reportaxe de Letizia Ortiz, la Reina, en La Nueva España, que ponía como titular “Políticos de Guardia”, y llevaba una estaya titulada “El fax del PAS”, ilustrada cola to semeya, sonriente nella, esa semeya simboliza bien el trabayu y aciertu constante tuyos.
Pero, sobre too, quiero date les gracies personalmente, Chus. Pola to amistá, pola to intelixencia, sabiduría y paciencia, pol to humor, pola to bonhomía ensin fienda, pola to compañía, por esos vinos o eses sidres que tomamos tantes vegaes y esos ratos nos que falábemos de tantes coses. Eses conversaciones vamos siguir teniéndoles, Chus, por desgracia, ensin la to presencia, pero vamos calteneles siempre.
Gracies por too, Chus, collaciu, amigu, compañeru, munches gracies.